Шайх Равил Гайнутдиннинг "Шариатга замонавий назар" китоби шариат ва унинг мақсадларини ўрганишга қаратилган замонавий назар ўлароқ, кадимги асл диний таълимотларни ҳозирги кун воқеълиги талқинида акс эттиришга уринишдир. Узоқни кўзлаган бундай ёндашиш мусулмонларга тўғри йўлдан оғмаган ҳолда замон билан ҳамнафас бўлишга, салафи солиҳлар изидан боришга ёрдам беради.

"Шариат мақсадлари”ни ўрганувчи илм мавзуи осон эмаслиги баробарида, уни мукаммал ўрганиш барчага тенг фарз эмаслигини ҳам айтиш керак. Шундай бўлсада, ушбу асар олимлардан тортиб илм аҳлидан бўлмаган турли савиядаги кишилар учун фойдадан холи бўлмас, деган умид бор. Зеро, муаллиф ушбу китобга нафақат диннинг дақиқ бобларини, балки кенг омма учун тушунарли ва манфаатли бўладиган мавзуларни ҳам киритган.